The Starbucks Zodiac Recommendations

星巴克咖啡 (Starbucks) 最近喺官方 IG 公佈咗星座飲品，推薦 12 款唔同飲品畀 12 星座！哇，除咗每日星運同流年運程之外，原來而家仲有埋星座飲品！

好，唔再多講廢話，即刻畀大家睇睇十二星座對應嘅飲品先：

水瓶座最適合飲Blonde Latte，因為經特別烘焙嘅咖啡豆適合跳脫嘅水瓶座！

香港 Starbucks menu 雖然冇 Blonde Latte，但就有兩款Blonde Roast 嘅咖啡豆出售。如果身為水瓶座嘅你真係好想飲嘅話，可以自己買嚟沖！

咖啡、牛奶、朱古力、碎朱古力片同忌廉溝埋一齊嘅朱古力星冰樂，就同愛幻想、浪漫嘅雙魚座一樣咁夢幻同充滿活力！

白羊座直率、熱情又有少少傻更更，最啱飲粉色系嘅飲品；所以士多啤梨椰子飲就係最啱白羊仔女！

雖然香港 Starbucks 未有得飲住，但大家可以試試同為粉色系飲品嘅冰搖草莓檸檬綠茶 Iced Shaken Strawberry Green Tea Lemonade！

至於係務實謹慎、精打細算嘅金牛仔女，Starbucks 推薦你哋要飲色澤深沉踏實，味道易入口之餘又充滿香濃抹茶味嘅凍抹茶牛奶！

真性情、好似小朋友咁純真，但係又三心兩意嘅雙子座，一次過飲凍熱兩杯嘅美式咖啡就最適合不過。哈哈，所以Starbucks 提議雙子座一於幫襯夠兩杯，同朋友share又得，自己飲哂佢又得，得咗！

顧家又溫柔嘅巨蟹座就好似一杯熱茶咁溫暖，薄荷香檸綠茶加蜜糖就啱哂巨蟹仔女！

獅子座堅強、可靠，有領導力，最適合酸酸甜甜、味道鮮明嘅熱情果冰茶。

香港 Starbucks menu 冇外國 Teavana 嘅 Iced Passion Tango Tea，可以選擇冰搖芒果熱情果茶 Iced Shaken Mango Passion Juiced Tea！

細心得嚟又身為完美主義者嘅處女座，可以一試冰涼又甜蜜嘅焦糖咖啡。

和藹可親嘅和平使者天秤座，溫和又公正，最適合味道濃醇嘅鮮奶濃縮咖啡 Flat White。

天蠍座敢愛敢恨、愛恨分明嘅性格，就好似味道強烈嘅濃縮咖啡！

愛好自由、氣息清新怡人嘅人馬座就最啱飲充滿夏日風味嘅水果系列飲品。

香港 Starbucks menu 雖然冇芒果火龍果特調，但係你都可以選擇芒果熱情果星冰樂Mango Passion Fruit Frappuccino，同樣都夠夏日熱情嘅感覺！

成熟穩重嘅山羊座就可以選擇冇多餘調味，樸實又好喝嘅冷萃咖啡。

唔知大家覺得準唔準呢？大家可以隨時去 Starbucks 試下！