方大同《TIO靈心之子演唱會》

【2019紅館演唱會】方大同自從成立咗獨立音樂品牌賦音樂之後一直好少上水，最近終於傳嚟好消息，就係確認會喺紅館開《TIO靈心之子》演唱會！

日期及時間：3月30 & 31日 20:15-23:15

《TIO》嘅名稱由來係來自方大同嘅新歌《Throw It Off》嘅首字母，喻意拋開負能量，並以歌詞寄語「Follow Your Heart」，追隨自己本心嘅善良一面，將多餘嘅雜念捨棄，令心靈更為平靜（聽落真係夠哂佛系！）。

而「靈心之子」就對應方大同第一張專輯《Soulboy》，表達「活在當下」嘅心理狀態同生活感受。喺過去 4 年冇同歌迷見面嘅時間裡面，方大同做咗多方面嘅嘗試，例如發行兒童童話小說、參與電影劇本創作、為其他歌手作曲同擔任監製等，呢啲唔同嘅工作令佢感覺自己重返新人時期，以赤子之心勇闖新世界。

方大同今次結合呢兩個概念為演唱會主題，希望將佢過去呢 4 年嘅領悟同感受同歌迷分享，以音樂細訴佢嘅創作初心。

為咗報答期待已久嘅歌迷，方大同對演唱會事事親力親為，一絲不苟。除咗音樂創作之外，喺燈光音效、舞台設置同編排上，方大同都會細心同工作人員討論協調，寄望今次演唱會，除咗可以維持一貫方大同專屬嘅音樂色彩之外，仲會為歌迷帶嚟一種簡約嘅美感同視覺驚喜！