蒙眼纜車「心導」挑戰賽

昂坪360喺上年首次舉辦纜車慈善籌款活動──「蒙眼纜車體驗」，有見反應良好，決定再接再勵，喺2019年1月13日舉辦「蒙眼纜車『心導』挑戰賽」，為參加者準備一系列歷奇活動同競跑挑戰。

當中包括赤腳跑天壇大佛樓梯、蒙上眼睛喺纜車上自拍等。當中唔少活動都需要參加者互相合作，令佢哋喺過程中更深入地了解、支援同扶持對方。大會更邀請到著名填詞人梁栢堅同小巨肺譚芷昀（Celine）義務創作活動主題曲，當中Celine妹妹更會獻唱主題曲。

活動唔單止好玩有趣，而且甚有意義，籌得款項將全數捐予香港小童群益會，以支援「關注兒童及青少年精神健康」項目，幫助兒童同青少年對抗負面情緒，加強抗逆力。