【新婚大日子】聘用新娘化妝4大注意事項

更新於2021年08月13日

有人話結婚係一生人一次,新娘當然要做全場最矚目、最靚嗰個啦!除咗物色婚紗晚裝,新娘最緊張莫過於自己嘅妝容。市面上,化妝師都係自由工作者為主,有時交易都未必有白紙黑字講明服務條款,令雙方隨時出現誤解甚至發生不快事件。唔想喺大日子因錢銀問題同服務細節造成爭拗?等Toby 話你知聘用新娘化妝嘅重要資訊同注意事項啦!

快速瀏覽

新娘化妝Set頭點計錢?

新娘化妝收費因人而異,化妝同Set頭可以分3個收費階段,包括試妝費、訂金以及婚禮當日交付化妝費。

試妝係俾新娘睇下妝容合唔合乎心意,每次試妝價錢介乎$200至$600。過程大約需要2.5至3個小時,化妝師會幫客人研究2至3個妝容及髮型。如果雙方對試妝效果滿意,就可以進一步落訂金。

唔少人對訂金存有誤解,以為訂金包括結婚當日化妝費,但其實大部分化妝師收取訂金只係作預留檔期嘅費用。

真正嘅化妝費係婚禮當日支付,有化妝師於開工前收錢,有化妝師於完工後收錢(亦係一般人所稱嘅尾數),做法人人唔同。化妝費定價視乎造型數量、化妝師名氣以及經驗而定,如果係老行尊或者名牌化妝師當然會比較昂貴。

整體而言,一個造型收費介乎$1,500至$4,000,通常適合婚禮註冊或新娘出門等場合。如果新娘想早晚轉妝同換髪型,兩個造型價錢介乎$3,000至$5,000。若新娘希望化妝師全日跟場,價錢介乎$5,000至$15,000,通常包括4至6次換妝。(以上所有價格只供參考,不同化妝師收費可以有頗大出入。)

新娘化妝師要履行乜嘢責任?

坊間新娘對化妝師有唔同期望。有人覺得化妝師要貼身服侍,包括拉裙掛之類。事實上,即使係全日跟場嘅化妝師,其責任範圍都只限新娘化妝以及髮型,其餘事項只屬於義務性質。

試妝時,每個化妝師有責任就客人膚色、喜好、面型輪廓建議幾個化妝風格同髪型。過程當中,化妝師要做足基本清潔、護膚、底妝、面妝及補妝工作。但補妝次數可圈可點,視乎實際需要以及婚禮節目安排。大部分全日跟場嘅化妝師會喺拍攝之前以及賓客進餐時補妝或換妝。

支付尾數有變數?

新娘要注意,以上價錢未必係最終收費,因為過程中有可能產生預料唔到嘅額外費用。如果客人一開始並無要求全日跟場,到當日突然要求補妝及髮型修飾等,都需要另議,價錢介乎$200至$600。如果伴娘、姊妹以及其他親友要化妝,需按人頭或造型數目另外收費。除此之外,婚宴經常比原定時間長,若新娘需要化妝師延長服務,必須「補水」支付超時工作費用。以上種種額外收費,都可能令尾數比原定金額多。

聘用新娘化妝4大注意事項

結婚始終係人生大事,每對新人都希望高高興興度過,有番個美好回憶。如果因為錢銀問題或服務細節上出現狀況,大家都感到掃興。搵化妝Set頭服務時,緊記以下幾個注意事項,讓自己有一場順利嘅婚禮。

1)做足資料搜集

好嘅髪型化妝師唔單止將你形象重新打造,而且為人要具備責任心。準時出席重要日子,相約好嘅檔期亦唔能夠隨時更改,而且數目分明、手腳乾淨,唔會偷竊主人家財物等都係職業同道德操守。對一般人嚟講,搵髪型化妝師可能無從入手。建議到新娘討論區或HelloToby上參考化妝師評價同作品相片,精選信譽良好嘅服務提供者。

2)提早預約試妝

如果你唔想重要場合出現差池,建議提早預約試妝。因為試妝就如見工一樣,係雙方有個機會互相了解同磨合。新娘值得花時間試多幾個造型,以及尋找與自己風格、性格配合嘅化妝師。對化妝師嚟講,試妝時掌握好對方想要嘅效果亦方便日後工作。新娘化妝師喺吉日、旺季特別繁忙,所以記得提早預留檔期。

3)充分溝通

揀好化妝師後,千祈唔好掉以輕心。無論化妝師同新娘起初有多投契,工作交涉還是要小心處理。最理想雙方簽訂合同,講清楚要為多少人化妝、換妝及補妝次數多少、超時工作收費如何計算、車資收費數目以及付尾數時間等等。萬一出現任何問題,大家都有依據。

4)留意產品質素

好多人都有皮膚敏感,所以要留意化妝品同頭髪定型產品係咪符合自己皮膚性質。你仲要特別留意化妝掃嘅清潔程度,因為化妝掃會殘留上手嘅分泌物以及滋生細菌,一旦處理唔好會影響自己皮膚。最保險做法係提供個人用品俾化妝師,以免當日有問題時出現爭拗。

Toby 你的專業婚禮專家

正在構思籌備你兩個嘅完美婚禮?即上Toby搵專家幫手啦!無論係婚禮場地租賃婚紗租賃証婚服務婚禮花球設計等等,都有專家可以幫到你!

只需3步,物色全港最佳婚禮化妝!

服務評價

5.0
(240)
Cara
5.0
2022年07月12日

十分好!

匿名用戶
5.0
2022年07月07日

Very smooth communication! Boey is friendly and professional! The hairstyle is perfect and gorgeous! Our wedding day was very successful and we had a great time! Thank you Boey.

Poleung
5.0
2022年03月09日

在很趕急的情況下找到Cynthia, 回覆快速清晰,立即決定聘用。化妝造型十分滿意,媽媽妝,化妝前細心詢問客人要求,出嚟結果大方得體,媽媽十分滿意,過程亦十分細心。

更多婚禮資訊