到底玫瑰痤瘡係咩？ 了解成因及治療方法
咩係玫瑰痤瘡？
玫瑰痤瘡係一種好發於T字位嘅慢性炎症疾病，主要係面部血管神經系統出現失調而導致面部過度充血所致。由於常見症狀係表面皮膚顏色呈玫瑰紅色，且形狀類似痤瘡，故被稱為玫瑰痤瘡。
玫瑰痤瘡病徵
玫瑰痤瘡經常被誤以為一般皮膚敏感，以下為5種玫瑰痤瘡表徵：
表面徵狀 | 易被誤會成的問題 |
面部容易受到刺激，出現間歇星充血情形，產生灼熱、刺痛等感覺 | 皮膚敏感 |
患處會出現丘疹或膿頭，如被擠破會加重發炎症狀 | 一般暗瘡 |
出現紅斑，面頰、鼻會出現彎彎曲嘅微血管擴張 | 皮膚過敏 |
當充血情況持續，皮膚會變得漸厚且粗糙，而鼻亦可能變得又大又紅，亦即「酒糟鼻」 | 食物過敏 |
眼睛同面部一樣容易發紅 | 紅眼病 |
玫瑰痤瘡成因
玫瑰痤瘡嘅成因包括：
1. 先天因素
遺傳因素，或天然免疫功能異常，導致對各種外界刺激非常敏感，容易引起皮膚炎症反應；
2. 後天刺激因素
如飲酒、經常進食辛辣刺激食物、過量咖啡因、朱古力及甜品等，都有誘發或加重玫瑰痤瘡問題；
3. 細菌因素
日常環境中佈滿塵埃及蟎蟲，而蟎蟲帶有一種有機會令人體免疫系統失調嘅桿菌（Bacillus Oleronius），引致皮膚產生炎症。
如何治療玫瑰痤瘡？
如果懷疑自己患上玫瑰痤瘡，記住要盡快求醫，確保得到適切嘅治療，以免令病情惡化！醫生會根據個人情況而制定不同嘅治療方案，一般包括局部外用藥物、局部冷敷、冷噴、激光治療、皮膚屏障修復以及口服藥物治療等方法，其中以激光治療方法相對較安全及效果較顯著：
激光治療原理
利用光熱作用，選擇性對玫瑰痤瘡患處照射，將異常嘅毛細血管進行滅菌修復。由於玫瑰痤瘡有別於一般暗瘡，表現症狀比較嚴重、復發情況亦較常出現，因此採用激光治療可以較徹底地處理問題，而修復後嘅皮膚健康狀況亦會有明顯改善。
不過要留意，玫瑰痤瘡一般需要經過 1-3 個月嘅持續治療先會受到基本控制或者明顯好轉，患者應該盡量保持耐性並堅持治療，平時亦應該盡量保持心境開朗，時刻調節心情。
記住，無論你希望採用邊一種治療方法，都要先向專業人士諮詢，千祈唔好自行用藥呀！
日常護理方法
除咗正式治療之外，我哋亦可以從日常生活中入手以防止玫瑰痤瘡惡化：
1. 做好日常防曬
玫瑰痤瘡患者嘅皮膚比較脆弱，因此避免紫外線刺激尤其重要；喺病情受到基本控制後，可以考慮使用溫和嘅防曬霜，而病情嚴重時則需要盡量避免強烈陽光直射；
2. 保持正面心情
保持心境輕鬆愉快，保持健康嘅生理作息，患者應盡量放鬆心情，避免緊張、焦慮或情緒激動，有利於病情康復；
3. 健康飲食習慣
應盡量以清淡為主，戒煙酒、辛辣、油膩等食物；
4. 注重保濕
需要長期使用保濕護膚品，保護皮膚屏障功能，可減少復發或加重；
5. 避免高溫刺激面部
盡量避免進行蒸臉、桑拿等會令毛細血管擴張加快嘅活動，以免令玫瑰痤瘡症狀加重。
總結
玫瑰痤瘡發作的確令人感到非常困擾，但只要做好日常護理、保持良好生活習慣同經過適切嘅治療，就可以解決問題，回復健康肌膚！遇上問題記住唔好自己估估下（心情都會影響病情！），要即刻搵專業人士檢查，盡早開始治療！