Yoho Town 私家樓393呎元朗裝修設計

今次呢個位於yohotown嘅單位以木白色作主調，打造出一個溫馨治癒嘅木系窩居，而設計師喺唔同位置都運用咗各種巧思，令成間屋簡潔得嚟但又唔會覺得單調。 客廳一幅木條子電視牆配合木假天花，令空間充滿自然嘅感覺。由於單位原則嘅廚房比較狹窄，所以設計師就將佢搬咗出飯廳🍽改用開放式設計，而原先廚房位置就改造成儲物櫃同納入飯廳範，大大增加咗客飯廳嘅空間感！ 廚房牆身就採用咗凹凸花紋磚，喺燈光照射下好有質感。而為咗增加工作枱面嘅面積，設計師巧妙咁連接埋窗台收納櫃面，形成咗長L型枱面，可以放碗碟同多士爐。 唔少人嘅屋企都可能有條冇咩用嘅長走廊，但設計師就將呢個缺點變成優點，喺走廊位置造咗磁石牆同層架，方便戶主同小朋友隨意貼一啲海報畫作，彷彿將畫廊搬咗入屋企咁！ 小朋友房貫徹木白色設計，書枱牆身特意造咗水松板，可以釘住學校通告同鎖匙扣，美觀實用兼備！而床尾就有一幅木洞洞版牆，啱晒用嚟放公仔同小盆栽美化一下。 主人房就以翠綠、湖水綠襯木色設計，俾人一種置身於森林嘅感覺，非常舒服。床尾造咗一組大衣櫃，屋主嘅衫褲雜物就唔怕冇位擺啦！