踏入9月又就快到中秋，當然見到唔少月餅廣告，而各大酒樓同餅家都開始賣緊月餅券，為咗唔想大家買錯月餅，中秋之後肚腩圓過月亮，專注純網醫保嘅Bowtie（保泰人壽）為大家搵嚟營養師MasterJack，等佢以專業嘅角度，出手教吓Toby讀者揀月餅啦！
MasterJack：
今時今日月餅有好多種，花多眼亂，而且仲越嚟越吸引，真係好難忍㗎。其實唔使忍，所謂「少食多滋味」，過時過節食少少我覺得無咩問題，不過揀嘅時候如果可以揸緊宗旨，就算食咗月餅都唔需要太內疚。
月餅卡路里/脂肪比較
| 月餅 | 卡路里（Kcal/個） | 脂肪（g/個） |
| 雙黃白蓮蓉月餅 | 800 | 40 |
| 芒果味冰皮月餅 | 260 | 9 |
| 朱古力味冰皮月餅 | 320 | 13 |
| 五仁月餅 | 350 | 13 |
註︰以上營養資料只供參考，不同品牌或有分別
首先，大方向係多數冰皮月餅都會比傳統月餅低卡路里，同埋無咁高脂肪，平時一個傳統大細（180g）嘅雙黃白蓮蓉月餅含大約800Kcal / 40g 脂肪，而一個芒果味嘅冰皮月餅（100g）含大約260Kcal / 9g 脂肪，朱古力味大約有320Kcal / 13g 脂肪，你就算乘返同等大細，都一定係冰皮低卡低脂好多。
我對五仁月餅嘅態度中立，健康程度方面，佢又唔係特別好，但又唔係特別衰，好唔好食，就個人口味各有不同啦。不過因為多果仁，所以脂肪都唔少，一個月餅大約含350Kcal / 13g 脂肪（雖然脂肪唔太低，但係好彩果仁嘅飽和脂肪多數都較低，所以壞膽固醇唔會升得太高。）
至於雪糕月餅，其實就即係雪糕，你就當用咗平時食雪糕嘅quota 去食囉。
揀月餅要睇營養標籤
講咁多都無用，因為市場上有N咁多款月餅，我點會知道晒佢哋嘅卡路里同脂肪呀，所以最緊要識睇食物營養標籤。
每個標籤會顯示卡路里、蛋白質、總脂肪（下面仲會有飽和脂肪同反式脂肪）、碳水化合物（另會顯示埋糖份）同鈉（即係鹽呀），同埋最緊要嘅係留意︰成個標籤係用「每食用份量」抑或「每100g/ml」 計算。
通常比較「肥」嘅食物都唔會用「每100g」去計架喇，計出嚟條數咁大會嚇親人㗎嘛，好似冰皮月餅咁100g 會切4份，再用「每1/4個25g」 嚟計算個標籤。同樣例子包括薯片，個標籤都係用「每幾塊」嚟計算！
最緊要係睇脂肪含量
另外，我都係貫徹宗旨，我唔最著緊卡路里，最緊要始終係每個月餅有幾多脂肪，同埋當中幾多係飽和脂肪同反式脂肪。我一路都話脂肪嘅吸收率係近乎100%，食幾多吸幾多，吸收完身體又唔願拎出嚟用，咁就好易肥！
而飽和脂肪同反式脂肪更加會升高血液入面嘅低密度脂蛋白—膽固醇（統稱:壞膽固醇），跟手就會增加血管栓塞嘅風險。同埋，我哋會睇埋 總脂肪：飽和脂肪+反式脂肪 嘅比例。總之，如果喺呢堆脂肪入面，有好多都係壞脂肪，咁就唔值得買啦。之不過，其實食咗幾多落肚最實際，所以總飽和脂肪+反式脂肪呢個數都好緊要。
仲有記得盡量唔好買有棕櫚油成份嘅月餅（其實乜食物都係啦），呢啲油雖然平，但就好高飽和脂肪，絕對係植物油界嘅「豬油」，好唔健康。（細細聲講︰大佬，幾百蚊買盒月餅，但係餅家仲俾棕櫚油你，過唔過份呀……）
糖尿病人可以食咩月餅？
至於有糖尿病嘅朋友就應該選擇低糖月餅，佢哋唔止要睇脂肪，仲要睇 1.總糖量 同 2.碳水化合物：糖 嘅比例，因為總糖量關升幾多血糖事，碳水化合物：糖 就關升幾快事。低糖月餅成份係代糖，雖然同普通雙黃白蓮蓉一樣咁多卡路里，但糖份近乎零，咁血糖就冇升得咁快喇。低糖月餅仲會有句提示（見下圖），幾窩心。
有腎病嘅朋友，如果你嘅鉀同磷都偏高，可能就唔適合食五仁月餅，同埋啲好多豆同好多水果喺入面嘅月餅。順便提提你，腎病病人千祈唔好食楊桃呀！（註︰楊桃入面含有神經毒素—草酸oxalic acid，對正常人無害，但對腎功能受損，即過濾排廢功能下降嘅人士，係會引致中毒同生命危險㗎。)（1）
雖然各大商家仲賣緊月餅，唔知仲有無新款出爐，但到6月尾為止，我淨係見到一個大型餅家有喺自己網頁上面大大方方顯示自己每款月餅嘅營養數值。我唔係話佢啲月餅係最好味，不過呢點係抵讚嘅，They earned my respect!
原文：【中秋節】邊款月餅無咁肥？營養師教大家點樣選擇健康月餅！
作者簡介︰
MasterJack (APD, DAA)
為澳洲註冊營養師，過住日頭睇症，夜晚落廚既雙重身份生活。因為成日踢爆健康飲食既迷思，太老實呃唔到飯食，要夜晚去做廚幫補生計，收工再賣字為生
關於Bowtie：
Bowtie挑戰固有行業傳統，揉合專業知識及尖端科技，改革消費者購買保險的方式、減少多餘的投保、索償程序與魔鬼條款。我們從香港人切身需要出發，提供合身的「純保障」產品。
參考資料:
- Chang J, Hwang S, Kuo H, Tsai J, Guh J, Chen H et al. Fatal outcome after ingestion of star fruit (Averrhoa carambola) in uremic patients. American Journal of Kidney Diseases. 2000;35(2):189-193.
*本文章內容由MasterJack提供並只供參考，不代表Bowtie立場，Bowtie對任何人因使用或誤用任何信息或內容，或對其依賴而造成的任何損失或損害，不承擔任何責任。
——
緊貼HelloToby Blog同Facebook Page，隨時搵HelloToby幫手！
