【專訪美甲師】Kumi：十指十趾變甲術

年尾年頭，又係大時大節嘅日子啦！聖誕、除夕剛剛過去，準備迎接農曆新年。各位女士諗好今年著乜新裝未？除咗衫褲鞋襪同儀容之外，拜年嘅時候都好容易露出手指（攞利是），所以指甲都要換新裝啦！ HelloToby 專訪本地美甲師 Kumi，分享佢個人美甲經驗同大爆2017年至Hit美甲情報。

自立門戶，打造個人品牌

Kumi由2010年開始接觸美甲，數數手指佢入行已經有7個年頭。初初踏入社會時，佢擔任文職工作；同好多女仔一樣，Kumi因為鍾意扮靚而公餘進修Gel甲及手足護理課程，後來離職並且入行到本地連鎖店當了5年全職美甲師。直至2年前， Instagram及Facebook興起網上商店熱潮，Kumi就開始利用網上平台自立門戶。

Kumi坦言：「自己創業絕對比打工繁忙，以Freelance形式接 Job收入較唔穩定。營運美甲店不論喺打造品牌、經營還是銷售，都難免有商業考慮，開始要兼顧網上Marketing。」

雖然本地美甲市場空間唔算細，但金錢上回報亦唔多。要喺芸芸美甲同行之中突圍而出，的確要花功夫建立品牌特色。幸好「出外靠朋友」，Kumi早期客源有朋友介紹，更夥拍好姐妹提供化妝美甲一條龍服務，更有知己為自己設計品牌標誌。佢期望透過自己作品集能夠打動客人，所以喺拍攝、設計風格同排版都花好多心思，例如每次上門服務會準備打燈、布景板等器材幫作品留倩影。近期，Kumi經 HelloToby 得到時裝界名人RJM以及網上時尚媒體Hong Kong Mcdame青睞，邀請佢提供上門美甲服務，相信心思係能夠讓有心人被看見。

將心比己，只賣優質產品

除咗用心建立品牌形象，Kumi深明口碑先係致勝關鍵，所以喺品質控制方面要求特別嚴格。佢直言：「朋友同客人信任得過自己，我都希望提供美甲師應有嘅水準，畀最好嘅服務人哋。」事前準備方面，一定會為客人做保護措施，例如搽底油避免顏色沉澱於指甲。另外，只會購入大牌子產品，講究產地同成份，指甲油要色澤鮮明、順滑易推。由於部分指甲油嘅化學物質會影響胎兒，所以亦提供天然甲油畀客人選擇，讓愛美媽媽都可以扮靚。