【夏日美白攻略】 搽防曬 5大常見錯誤
俗語話「一白遮三醜」，所以唔少女士都不惜大灑金錢買 美白 產品，慕求令肌膚更加雪白。夏日殺到，紫外線急升，想保持皮膚白晳，做到 夏日美白 ，最重要都係要由防曬做起。今個夏天想去海灘盡情咁玩、痛快游水，但又唔想曬到變黑炭？Toby 為大家剖析一下搽防曬嘅基本概念同埋5大常見錯誤，立即睇下你有冇犯錯！
快速瀏覽
1） 點解要防曬？
防曬並唔係淨係為咗保持皮膚白皙咁簡單。陽光中嘅 紫外線 UVA 會令皮膚變黑、老化、產生皺紋，而 UVB 則會令皮膚曬傷、紅腫、脫皮，所以陽光可以話係皮膚嘅「頭號殺手」。
當你嘅皮膚長期受到紫外線照射，日積月累之下更有機會誘發 皮膚癌，所以搽防曬係護膚非常重要嘅一步。
2） 紫外線 UVC、UVB、UVA 係乜？
簡單咁講，紫外線波長介乎 100 – 400nm，裡面一共可以分為 UVC 、 UVB 、 UVA 三種波段。我哋所講嘅防曬，其實主要係針對 UVB 和 UVA 對皮膚嘅傷害。
其實 UVC 對人體皮膚傷害最大，太陽光在進入地球之前，紫外線裡面嘅 UVC 會被臭氧層吸收，所以基本唔會接觸到。
UVB 會導致皮膚曬傷，出現變紅、疼痛、乾燥的症狀，一般黎講，正常人持續暴露在陽光底下暴曬25分鐘， UVB 就會引起曬傷的情況。講到呢度，聰明嘅你應該諗到，其實市面上大多數嘅防曬產品都係針對 UVB 防曬 ，避免皮膚曬傷 ！
紫外線當中有超過九成都係 UVA 。 UVA 穿透力強，可以輕鬆到達真皮以下嘅組織，破壞膠原蛋白、纖維組織，導致皮膚鬆弛、產生皺紋，而且仲會令你起斑。我哋成日講曬得多會起斑，就係咁解！
3） 防曬SPF 意思係？ 防曬PA 意思又係乜？
防曬產品成日見到寫住 SPF 同 PA ，其實佢哋究竟代表乜意思呢？
其實 SPF 即係 Sun Protection Factor ，係衡量防曬產品阻擋 紫外線 UVB 嘅防曬指數，可以計算出喺一般情況下將曬傷時間推遲幾耐時間。譬如，如果你冇用防曬產品，喺陽光底下曝曬10分鐘就會曬傷嘅話，咁用 SPF 15 防曬產品 就可以延長15倍時間，即係150分鐘後至曬傷。
至於 PA 係指 Protection Grade of UVA ，即係評估防曬產品對 UVA 嘅 防曬能力 。 PA 值一般可分為 PA+ 、 PA++ 、 PA+++ 、 PA++++ 等4種， PA+ 可將曬黑時間推延 2 – 4倍， PA++ 係 4 – 8倍， PA+++ 則可達8倍。
4） 唔同嘅SPF 防曬幾時用？唔同嘅PA 防曬時間？
SPF 低於 10 ，一般適用於春冬季早晚時段，以及陰雨天，因為紫外線強度較低。
SPF 10 – 20 ， 常用於夏季早晚時段，應付中等強度的陽光。
但如果你長期處於室外、接受到強烈陽光照射，就需要用 SPF 21 – 30 防曬產品 ！
至於常見到 SPF 大於 30 嘅防曬產品，係針對特殊環境而用，例如在高原戶外活動、長時間強烈陽光暴曬。
至於 PA 防護時間方面， PA+ 大約係4個鐘， PA++ 大約係8個鐘， PA+++ 大約係8個鐘以上，PA++++就可以做到防曬16小時。
5） 搽防曬 5大常見錯誤
知道 SPF 同 PA 代表乜之後，就可以因應個人膚質同需求挑選防曬產品。不過唔好以為買支防曬乳，臨出門前搽下就夠。好多人都對 搽防曬 有種種誤解，立即 Check 以下 5大常見錯誤，睇下你有冇犯啦！
消費者委員會調查發現，近半數港人忽略防曬嘅重要性，並且對防曬措施存在唔少誤解！夏日紫外線指數咁高，記住做好防曬準備，先好去同陽光玩遊戲。
錯誤1： 防曬系數愈高愈好
唔少人都有個迷思，就係認為防曬系數愈高愈好嘅。但根據數據顯示， SPF 15 可以阻擋93% 紫外線UVB ； SPF 30 可以阻擋97%；而 SPF 50 可以阻擋98%。由此可見， SPF 50 嘅防曬效果只係比 SPF 15 高5%左右，所以好多皮膚醫生都建議市民用 SPF 15 或者 SPF 30嘅防曬產品就夠。
一來防曬系數愈高，對皮膚愈大負擔，二來唔少人以為防曬系數高就有足夠保護，反而容易掉以輕心，喺戶外逗留更長時間。其實如果你大部分時間都留喺室內， SPF 15 – SPF 20 、 PA+ 至 PA++ 已能提供足夠保護。如果你要長時間喺戶外活動，咁就適合用 SPF 20 – SPF 40 、 PA++ 或 PA+++ 嘅防曬產品。
錯誤2： 搽防曬 搽唔夠
想發揮最佳嘅 防曬效果 ，專家建議搽防曬產品嘅量係每平方公分肌膚至少要擦2毫克，即係表示面部同頸部至少要擦1茶匙，左右手臂分別要擦1茶匙，而大腿、小腿同足部總共要擦4茶匙，連埋其他身體部分計算，全身要大概搽9茶匙防曬至足夠！如果搽唔夠分量，防曬效果就會大打折扣，就算防曬系數幾高都好，都係同冇搽冇乜分別。
錯誤3： 防曬只搽一次
喺香港，好多人都知道要喺出戶外前 15分鐘為身體 搽防曬 ，但好多人都係搽完一次就算。其實戶外防曬好容易因為洗面、洗手、流汗等原因而流失，令防曬效果大減，所以最好係每隔2個小時就要補搽一次。
另外，做運動時（例如踩單車、跑步、行山等），除咗身體會長時間曝露於太陽下，流汗亦會比平日多。運動員應挑選較日常 防曬乳霜 更為持久的 運動防曬乳霜 。運動型防曬乳防曬指數較高，能有效保護臉部、手、頸⋯⋯部份運動防曬乳亦有因應客人需要，而變得更清爽、不油膩。如果進行水上活動需要防曬， 游水、滑水前，就更要慎選防水型嘅防曬產品同勤力 補搽防曬 。
錯誤4： 搽咗有防曬功能嘅粉底或 BB Cream 就唔使搽防曬
而家好多 粉底液 、 BB Cream 等化妝品都加入咗防曬功能，不過唔好以為搽咗呢類產品就唔使搽防曬。除非你嘅底妝勁厚，否則你用嘅粉底分量不足以提供足夠嘅防曬效果，所以專家建議最好都係先搽防曬產品再上妝。
錯誤5： 夏天或者陽光猛烈時至搽防曬
好多人都以為陰天冇太陽就唔需要防曬，但其實紫外線一年四季都係無所不在，就算係冬天都一樣有紫外線。如果要喺戶外活動，最好都係搽番 SPF 15 嘅防曬產品。
想令皮膚更靚，除咗做好防曬後，仲要同毛毛講byebye！邊間脫毛好？Toby 為你比較五大脫毛公司，你梗揀到你心水！
