【台灣自由行交通指南】桃園機場往返市區指南

台北一向都係香港人短途旅行首選。相信大家心目中都有好多台灣好去處，但交通方面你又知幾多？相比起跟團，台灣自由行勝在可以靈活安排行程，但麻煩嘅就係要自己搵車、搵路。到埗之後第一件事就係搵路去酒店，到底點先可以節省桃園機場去目的地嘅交通時間？ HelloToby 邀請到 Airbare 幫你分析下乘搭桃園機場捷運、巴士同台北的士邊️種交通工具最適合你啦！

1）桃園機場捷運

機場捷運有兩款，分別係普通車同直達車。直達車只會停台北車站、新北產業園區站、長庚醫院站、機場第一航廈站同機場第二航廈站，部分班次會停高鐵桃園站同環北站，而普通車就會停沿途各站。

兩條線嘅班次都算密，大概十五分鐘就有一班車，但車程就相差幾乎一倍。直達車只需35分鐘，普通車就要成50分鐘。唔少遊客會選擇搭直達車去到台北車站再轉車，車程大概要40 – 50 分鐘，車費NT$160。

但記得捷運營運時間係6:00至22:45，如果搭凌晨機就要搵其它方法啦。

2）台北機場巴士

如果你凌晨至清晨六點到埗，就只有巴士同的士兩個選擇。客運巴士1819號（往台北車站）呢條線係二十四小時營運，大約15分鐘就有一班車，就算搭凌晨機都無問題。桃園機場客運巴士公司包括國光客運、長榮巴士同大有巴士，目的地包括台北車站、台北市區、松山機場、南港展覽館、台中等地。

以上全部車票都可以去客運巴士櫃檯買到，到時可以check左巴士抵達時間先揀搭邊班。至於車程同車費，以機場往台北車站嘅車程黎講，客運會耐過捷運，全程要55分鐘，但收費方面客運就平捷運少少，只需NT$125。

3）台灣高鐵

如果要去台中、台南或者高雄等就要先搭高鐵，再轉一程25分鐘嘅接駁車。費用除左高鐵車票，仲要加埋接駁車嘅費用（全票台幣30元、半票台幣15元）。雖然高鐵出名快（台北去台中只需要46分鐘），但車費要成NT$700，如果再加多程的士就成NT$700位。不過高鐵有時會推出優惠票，一個星期內可以任揀兩日無限次乘搭高鐵，咁條數就抵啲啦！

接駁車營運時間係06:15-22:50，日間班次較密，每15-30分鐘一班，到21:45-22:50就要20-40分鐘先有一班。