【我要揾工賺錢】大學五件事 搵大學生兼職全攻略!

更新於2021年08月13日

唔經唔覺又就嚟到9月大學開學嘅時候!大學生上堂時間唔多,有唔少人會喺空餘時間甚至「走堂」搵工、做炒散又或者星期六日兼職賺錢。對於一班啱啱入到大學,初嚟報到嘅學生,聽到就已經覺得好吸引!唔知可以返咩大學生兼職好?Toby 就一早已經幫你搜羅定最常見嘅學生兼職筍工,等你搵工唔洗咁徬徨!

1)補習—大學生兼職

大學生兼職補習可以話係其中一份最多大學生做嘅筍工。點解話係筍工?因為市場對補習老師需求大,只要你有相關學歷、文憑試考試成績、時間同心機,你就可以輕易搵到補習介紹。而且補習老師可以「叫價」相當之高,由補習老師時薪$130到$250不等,專科及冷門科目的補習老師每小時人工更可以達$350。但呢份「高薪厚職」背後亦有代價,補習兼職所花費嘅時間唔單止在於坐定定喺度向學生傳授知識,仲包括補習老師嘅課前預習同埋搵相應補習材料。同時,如果分別遇上極度懶散嘅學生或者蠻不講理嘅家長就會更麻煩!

如果你唔想應付「問題」家長的話,你可以選擇到補習社任職導師。雖然補習社時薪比私人補習為低,但勝在只需要輔導學生做功課同温習。如果你有特殊技能例如精通外語或者繪畫技術,你嘅時薪分分鐘比私人補習老師要高。同私補一樣,補習社招聘年中無休。只要你有心揾工,唔難搵到一份合適嘅補習工作。

2)政府工—政府暑期工&政府intern

另一份最多人搵嘅兼職係政府工。每年summer break,各個政府部門都會推出政府暑期工實習計劃俾大學生參與。參與嘅部門包括環境局、稅務局、懲教署、消防處等等,可以俾同學了解各個政府部門嘅運作。而且政府Intern月薪有$9800,係一個幾唔錯嘅薪金。對於畢後之後想搵政府工「鐵飯碗」嘅學生嚟講,係一個幾好嘅選擇。如果你有興趣,可以喺明年3月、4月嘅時候留意政府網站,搵適合你嘅政府Intern暑期工。

同時,政府亦會有唔同類型嘅兼職,例如康文署兼職活動助理、泳池救生員工作。只要同學有相關資歷證明,例如康文署招聘泳池救生員要求求職者先考取泳池救生章,就可以申請相關工作。救生員人工高達$79一小時,如果同學有時間的話,都係一份幾唔錯嘅工作。

3)港鐵兼職—學生兼職節省交通費

港鐵兼職亦係一個幾熱門嘅工作,一來港鐵招聘時薪唔算太低,由時薪$50到$80都有;二來有免費八達通,可以省去唔少日常交通費。港鐵嘅兼職主要有四種,分別係車站助理、客務中心助理、月台助理同頭等車票檢查員。四個工作共同點都係要經常同港鐵乘客接觸,所以難免會「受氣」,同乘客發生衝突。如果自問唔太鐘意同人相處的話,呢幾份工就似乎未必太適合你。

4)臨時工炒散—輕鬆揾工賺快錢

喺芸芸咁多種臨時工入面,其中一份最常見嘅臨時工就係兼職會展助理。喺香港呢個商業都市,每日都會有唔同類型嘅商業展覽,需要大量臨時人手。當中最大型嘅展覽就莫過於喺每年7月舉辦嘅香港書展。每年7月,都有唔少參展書商聘請一大班書展暑期工,負責處理攤位運作同向顧客銷售產品等工作。每小時薪金由$50至$70不等。如果你唔介意體力勞動,又願意抽幾日時間嘅話,兼職展會助理會係一份幾唔錯嘅工作。

除咗兼職展會助理呢類型工作外,其實仲有唔少高薪嘅臨時筍工。考評局每年都會聘請大學生做唔同工作,包括口試報到室主管、閱卷助理同口試助理。當中以閱卷助理為最高人工,其日薪為$800多。而且工作內容都係「手板眼見功夫」,一般都係點名、改卷等等。所以每年年尾都有唔少大學生應徵「搶住做」。

5)創業—搵錢發達好方法

依家有唔少大學生除咗讀書之外,都有開設網店賺錢。自問有商業頭腦嘅你,你可以趁自己空餘時間創業。你可以利用年青人常用嘅平台,例如Instagram,Facebook等開設自己嘅銷售平台,售賣唔同貨品。利用多人搜尋嘅Hashtag同喺朋友之間推廣,可以幫你擴闊客源,令你整盤生意得以轉虧為盈。

如果你平時經常來往唔同國家,你甚至可以做「海外代購」。海外代購指喺外國較低價購買商品,再以低過香港嘅市價賣出貨口,藉此賺取差價。薄利多銷,積少成多,只要儲到足夠嘅客源,海外代購都可以係一個收入相當可觀嘅行業。創業發達,從此唔再係空口說白話。

6)運動教練—星期六日兼職搵錢好方法

如果你係學校有參與運動校隊或曾經贏過唔少運動獎項嘅話,你都可以考慮做兼職運動教練。有唔少坊間社區會堂或者社區中心都會舉辦兒童運動班,例如兒童羽毛球班兒童籃球班兒童足球班等等,時薪一般由$150至$200不等。如果你自問有相當嘅運動經驗,又鐘意同小朋友相處嘅話,運動教練係考慮得過嘅一份兼職工作。

如果你有興趣畢業後投身私人健身教練行業的話,其實你已經可以喺課餘時間報讀基本體適能基礎課程,取得相關證書之後就可以喺大型連鎖健身店做兼職初級健身教練。如果你願意持績進修,又能夠同客人打好關係,假以時日,你就可以自立門戶,成為私人健身教練

7) 音樂導師 — 有能者居之

除咗做補習老師之外,另外一個比較多學生兼職就係樂器導師。由於有資歷認證,教樂器每小時收入最少都有百幾蚊或以上。如果你學習其他少人學嘅樂器如色士風豎琴或者低音大提琴嘅話,「叫價」可以去到幾百蚊或者以上。順帶一提,如果你有相關嘅表演經驗或者贏到相關樂器獎項,你嘅「身價」分分鐘可以以幾何級數上升。

如果同學曾經係學校樂團擔任指揮而且贏得獎項嘅話,你嘅經驗其實可以幫你搵到坊間其他學校樂團嘅相關工作。作為學校樂團指揮,你唔單止要為同學進行基本音樂訓練,仲要幫領佢哋參與唔同表演、比賽,平時亦要處理各式各樣嘅行政工作。要處理咁多繁重嘅工作,所以佢哋嘅時薪最少以四百幾蚊起跳。

學生想搵工賺錢?Toby 幫到你!

睇完咁多大學生兼職之後,有冇心思思都想搵返份工作或者暑期工呢?馬上去Toby 平台免費成為我地嘅專家,發掘更多客源,我地嘅專家服務平台簡單方便,只需幾步登記就能夠緊上搵適合你嘅客人!開展你嘅兼職工作!