想知五十肩成因及症狀? 4個舒緩方法助你改善五十肩

更新於2020年08月18日
分享

膊頭痛=五十肩?了解五十肩症狀、舒緩運動及治療方法

五十肩簡介及成因

「沾黏性肩關節囊炎 (adhesive capsulitis)」,又稱肩周炎,俗稱「五十肩」、「冰凍肩」。一般而言,健康嘅肩關節囊內部充滿滑液,令肩關節能夠正常活動,情況就好似上咗潤滑油嘅齒輪,運行狀况良好。但當肩關節囊發炎,就會有變厚、纖維化嘅可能,擠壓液體嘅存在空間,導致節囊內部滑液減少,令肩膊兩塊骨頭不斷摩擦,久而久之就會減損關節運作能力、出現關節沾連,影響肩關節活動度,形成「冰凍肩」。

唔少有五十肩患者都以為症狀會自行消失、自行痊癒,但其實疼痛消失只代表發炎消退,而肩關節囊內嘅沾黏依然存在,仍會影響患者肩部嘅活動度,若果冇經過適當治療,五十肩會隨時復發

點解會有五十肩?

直至目前,五十肩嘅確切成因仍然不明。但日常生活習慣有好大影響:如日常姿勢錯誤,會令肩膊肌肉過度緊張,影響肩胛骨正常活動,喺互相影響下,肌肉會變得更加緊張而導致肌肉出現不平衡狀況,最後導致肩關節周圍嘅纖維發炎及關節移位,形成「五十肩」。

圖片來源:enjoyyoung.com

五十肩症狀

五十肩患者嘅肩部將難以正常運作,進而影響生活品質,常見五十肩症狀有以下幾種:

1. 肩部時常隱隱作痛,持續時間較長

2. 睡覺時壓迫到患病側嘅肩膊會疼痛到無法入睡

3. 無法健康自如活動肩膊,打開幅度受到限制

由於五十肩磨損關節嘅病因,罹患五十肩嘅患者經常遇到嘅情況係「肩膊疼痛」同埋「抬唔起肩膊」。而正正因為肩膊抬起就痛,好多患者會諱疾忌醫,採取「由得佢」嘅態度,覺得只要唔抬起肩膊就唔會痛,導致病情受到拖延。如果問題唔盡早解決,日積月累下肩關節只會越來越僵硬,最後連初患病時仲可以自如做到嘅日常動作,例如更衣、梳頭、洗澡等等,都變得非常困難。

五十肩嘅發病過程可分為三個階段:

階段

時長

症狀

疼痛期 (Freezing)

持續 6 星期至 9 個月

肩關節囊開始發炎,擠壓滑液空間,滑液減少,兩塊骨骼間時常出現摩擦碰撞,疼痛開始產生並持續惡化

僵硬期 (Frozen)

持續時間 4至6個月

關節囊炎症逐漸消退,疼痛程度雖降低,但由於發炎期骨骼間嘅摩擦,令關節囊內留下結痂組織,導致關節沾黏,疼痛減輕但實際症狀加重,待下次關節囊發炎情況變得愈加嚴重

恢復期 (Thawing)

持續時間 6 個月至 2 年

通過醫生嘅診斷及治療後,關節沾黏狀況減輕,關節囊炎症消退,關節滑液質量恢復,逐漸恢復到發病前狀態

簡單五十肩舒緩運動

復康運動嘅重點在於伸展肩關節,幫助肩膊恢復活動能力。運動過程中如果覺得唔舒服,應立即停止動作,再同物理治療師討論合適嘅復康運動。

以下係常見嘅復康運動種類:

1.  爬牆運動

動作 1:面向牆壁,將肩膊向前向上抬舉,讓身體逐漸靠近牆壁,手指放喺墻面上一直向上爬,爬至最高點後停留幾秒鐘。

動作 2:將肩膊靠近牆面,身體往側轉,做手指側面爬墻運動。

2. 鐘擺運動

準備物品:一個 600CC 膠樽、一張有椅背嘅凳

動作 1:雙膝一前一後,再彎曲下半身,肩膊自然下垂,患部手持膠樽保持水平, 自然前後擺動。

動作 2:雙膝平行並立,身體與手臂同時左右擺動。

3. 扶牆外展運動

動作:將手平舉、手掌貼牆,身體再慢慢蹲下,藉由身體重量拉開粘連嘅關節囊。  

4. 外傳及內轉運動

準備物品:一條長毛巾

動作:雙手一上一下,拉住毛巾兩端,繞過背後,做上下拉動動作。

圖片來源:twhealth.org.tw

五十肩治療方法

要改善五十肩,傳統療法主要為藥物治療,例如中醫醫藥調理同西醫消炎、注射肌肉鬆弛劑;另外仲有長期物理復康治療。治療策略一般為先改善疼痛,然後穩定關節、恢復關節活動度。

假如韌帶或肌腱有撕裂嘅情況,醫生通常會採取保絡治療(prolotherapy),以促進肌肉組織嘅修復,治療後嘅肩關節舒展運動可以幫助鬆解關節嘅黏連,從而恢復關節活動度。

但受損程度嚴重,就可能需要進行受術,以修補受損嘅軟骨及關節囊啦。

總結

肩關節雖然唔起眼,但實際上係人體所有關節中活動度、活動頻率都相當高嘅關節,一但出現五十肩嘅症狀,即使症狀好似好輕微,都要盡快尋求解決方法,以免病情惡化進一步影響日常生活。患者同健康人士平時亦應該進行以上嘅簡單鍛煉,適當嘅肩部運動可以強化肌肉,改善關節的穩定性,改善或避免五十肩。

精選五十肩優惠