【 Fresh Grad 人工有幾高?】2017入行起薪點最高10大職位

好快又到 Fresh Grad 嘅求職季節。雖然剛畢業出嚟冇乜經驗,通常要由低做起,但都唔代表剛畢業就冇機會揾到高薪工作嘅。HelloToby為大家數下10大入行起薪點最高嘅職業!(→English Version

1)管理實習生(Management Trainee)

起薪點:$16,000 – $40,000不等

MT培訓計劃不嬲都係大學畢業生嘅熱門選擇,通常呢類計劃為實習生提供全面培訓,幫助員工了解公司嘅業務運作、架構同企業文化之餘,又可以學習管理技巧同知識。除咗有機會參與唔同類型嘅公司活動外,仲有機會獲調派到不同部門實習添!不過,做完MT唔代表一定會扶搖直上,揀計劃時記得要考慮埋公司規摸同晉升前景。以下係部分機構MT人工一覽:

馬會:約$16,000 – $18,000

港鐵:約$20,000

銀行:約$17,000 – $25,000

金管局:約$40,000 (見習經理及見習經濟師)

 

2)測量師

起薪點:$20,980

近年建築工程增加,但測量師人手短缺,令市場求才若渴。測量系學生畢業後如果入職政府嘅見習測量師,每月津貼為$20,980。成功考獲測量師資格後,便可成為助理屋宇測量師,月薪升至$25,000。累積一定經驗後更可成為正式測量師,起點為總薪級表第30點,即$56,755,頂薪可高達$100,000。

 

3)飛機師

起薪點:$24,235 (政府見習機師)- $36,000(港龍見習機師)

當年《衝上雲霄》熱播,燃起唔少人嘅飛行夢,但原來要成為飛機師一啲都唔容易。除咗要有良好視力同英語能力外,甄選時仲要經過筆試、面試、心理測試、身體檢查同試飛訓練。見習機師嘅起薪點約為$24,235 – $36,000不等,一般累積7 – 8年經驗同一定飛行時數後就有機會晋升至機長。有志成為機師嘅人可報考國泰或港龍嘅飛行員培訓計劃,又或者自費到國外考取飛行牌照。

(相關閱讀:2017香港10大 Freelance 工作,可以搵幾多錢?

 

4)文憑/ 學位教師

起薪點:$26,700(文憑教師)/ $28,040(學位教師)

一般教師職位可分為文憑教師(CM)同學位教師(GM),CM嘅起薪點為$26,700(14點),而GM薪金嘅起薪點為$28,040(15點),如果入職時有合適嘅學位教師教育證書等資格,起薪點更可上調2點,即高達$30,945(17點)。不過近年好多學校嘅GM職位有限,所以就算持有學位都可能只可以做住文憑教師。

 

5)政府二級行政主任 (EO)

起薪點:$28,040(15點)

年年政府招聘EO都係爭崩頭,因為EO人工高福利好,工作又穩定,係唔少人心目中嘅筍工。2016/17年度嘅EO起薪點為15點,即$28,040。EO嘅職責範圍包括人力資源管理、部門行政、委員會、議會支援同活動統籌等行政工作,仲會被派到唔同政府部門。EO日後有機會晉升至高級行政主任,頂薪更可高達$49,445!

 

6)註冊護士

起薪點:$28,040 – $30,000或以上

一般學生喺香港完成護理課程後就可成為登記護士,起薪點為$20,060(9點),不過如果繼續進修成為註冊護士,人工都會跟住水漲船高,月薪由第15點$28,040(普通科)起跳。香港醫院護士長期短缺,近年有私立醫院更調高入職薪酬至$30,000或以上希望吸引人才。

(相關閱讀:助你升職加薪轉好工的6大 進修課程

 

7)警隊督察

起薪點:$39,660 – $42,110

督察起薪點視乎學歷而定,持有學位嘅人工以$40,880起跳,如果喺綜合招聘考試嘅中英文試卷合格更高達$42,110。警隊仲可以享有房屋福利、免費醫療、牙醫服務同子女教育基金。要通過警隊嘅體能測試並唔容易,有心投考嘅朋友要提早準備。同學仔亦可以留意每年10月 – 11月警務處喺各大專上院校推出嘅警隊學長計劃。

 

8)見習律師

起薪點:$40,000 – $49,445(大律師行)

唔少法律系學生畢業後都會成為見習律師,不過人工就好睇律師行規模嘅,本地較小型嘅律師樓可能起薪點為$20,000左右,但如果入到一般大型跨國律師行嘅見習律師薪金可高達$40,000。律政司更有個見習律政人員計劃,為見習律師提供1至2年嘅實習訓練,頭12個月嘅月薪為總薪級第27點即$49,445,之後再加至第28點即$51,780。

 

9)政府政務主任 (AO)

起薪點:$49,445(27點)

同EO一樣,AO亦係唔少大學生趨之若騖嘅工作,起薪點為$49,455(27點),人工比EO高超過$10,000,但考取門檻亦比EO高得多。AO嘅工作涉及政策制定、資源調配同重大政府計劃等政務工作,考生要熟悉時事議題,了解政府嘅施政立場,比考取EO更難。所以近年就有一些坊間機構開設AO/EO投考課程,教授考生面試同筆試嘅技巧。

 

10)駐院醫生

起薪點:$50,000以上

醫生一直係備受尊崇嘅職業,其實佢哋工時長,工作繁重又壓力大,而且要完成6年醫科課程同1年實習訓練至能夠正式成為醫生,都咪話唔辛苦。公立醫院駐院醫生嘅每月底薪以約$56,755起跳,如果加埋每月津貼就更多。有一定年資同經驗後有機會晉升至副顧問醫生、高級醫生,甚至顧問醫生,月薪高達$100,000以上。

 

相關閱讀:【揾工必讀】優化 履歷 攻略:10大CV常犯錯誤

想搵到份好工,CV寫得好唔好相當關鍵!你可以考慮搵個CV專家幫你執執!

即搵履歷專家

以上工作都唔啱你?其實今時今日要增加收入嘅方法多得是。唔少人喺正職外仲會揾多份秘撈賺下外快。如果你自問都有一技之長,可立即加入我哋嘅平台成為服務專家揾新客戶!

立即登記

>>> 【 HelloToby 專家全攻略】如何註冊成為專家 + 如何報價 <<<

如果你想了解下我哋有乜服務,亦可以上HelloToby主頁瀏覽!

——

延伸閱讀:做 Freelance 的10大貼士

延伸閱讀:【大學畢業 起薪點 低?】5大最有「錢」途大學主修科

緊貼HelloToby BlogFacebook Page,隨時搵 #AskToby 幫手!

Leave a Reply

Your email address will not be published. Required fields are marked *